قصة نشأة Epic Cup

احنا عمار و عمر ،دايمًا كان عندنا شغف بالبطولات، خصوصًا بطولات بيس. في يوم كده فـ شهر 7 سنة 2024، كنا بنفكر: ليه كل البطولات اللي بنحاول نخشها يا إما بتقف بسرعة، يا إما نظامها عشوائي وعديم العدالة؟!

كنا بندور على حاجة فيها التزام، متعة، وعدالة... بس ملقيناش.

فيه جروب كان شغال من دولة عربية (بتبدأ بحرف الم) كان بيسرق الحسابات من الفائزين و يطردهم بعدها بحجه أنهم شتموه و كده ، وكان فيه كمان جروب مصري بس للأسف تفكك في شهر 6 بسبب عدم جديه المنظمين و عشوائيتهم.

ومن هنا جاتلي أنا (عمار) الفكرة...

ليه منعملش احنا الجروب اللي بندوّر عليه؟

جروب بطولات فعليًا منظم، مختلف، عصري، ويكون فيه عدالة ومتعة حقيقية!

قلت الفكرة لعمر، وهو خدها بجدية وبدأ يشتغل عليها فورًا، وفعلاً ابتدينا أول بطولة لينا يوم 18/7/2024.

ساعتها كنا لسه شغالين باسم Legends Championship، وكانت أول بطولة لينا بـ 16 فريق، واللي دلوقتي بقت معروفة بـ كأس الرحلة... لأنها فعلاً كانت بداية الرحلة بتاعتنا.

ومن هنا بدأ Epic Cup، مش بس كجروب بطولات، لكن كمجتمع صغير بيكبر كل يوم، هدفه الأساسي إنه يقدم تجربة مختلفة وعادلة لكل الناس اللي بتحب التنافس.